01.01.2006

Eimskip tekur við rekstri Herjólfs

Eimskip hefur tekið við rekstri Vestmannaeyjaferjunnar Herjólfs frá og með áramótum. Við þá breytingu hefur nýtt bókunar- og greiðslukerfi verið tekið í notkun ásamt nýju afsláttarfyrirkomulagi auk þess sem ný siglingaáætlun hefur verið tekin í gagnið.

Nýtt bókunar- og greiðslukerfi

Frá og með fyrstu ferð ársins 2. janúar geta farþegar Herjólfs í fyrsta skipti bókað og greitt fyrir farmiða í gegnum nýja heimasíðu Herjólfs, www.herjolfur.is.  Þar verður hægt að bóka og borga fyrir farmiða, svefnpláss og pláss fyrir einkabíla um borð í ferjunni.  Í framtíðinni verður einnig hægt að kaupa afsláttarmiða í gegnum sama kerfi, en fyrst um sinn fer sala afsláttarmiða fram í afgreiðslum Herjólfs í Vestmannaeyjum og Þorlákshöfn.

Afgreiðslustaðir Herjólfs verða þeir sömu og áður að undanskildum afgreiðslustað í Reykjavík, en framvegis verður afgreiðsla Herjólfs í Reykjavík staðsett í Vöruhótelinu, Sundabakka 2, 104 Reykjavík.

Ný siglingaáætlun

Siglingaáætlun Herjólfs hefur verið bætt til muna með því að fjölga ferðum frá því sem áður var.  Herjólfur mun sigla tvær ferðir fram og tilbaka á hverjum degi allt árið.  Þó er ferðum fækkað á vissum hátíðisdögum.  Nýja siglingaáætlunin gerir þannig ráð fyrir um það bil 720 ferðum fram og tilbaka á ári.

Nýtt afsláttarkerfi

Um áramót verður tekið upp svokallað afsláttarkerfi með sama greiðslufyrirkomulagi og við kaup á einstökum ferðum.  Kaupa þarf afsláttarkort fyrir að lágmarki 14.400 kr. og eignast kaupandi þá inneign sem því nemur.  Þegar viðskiptavinur á afsláttarkort með inneign fær hann afsláttarkjör sem nema 40% afslætti af almennu verði. 

Bætt aðstaða fyrir börn

Á næstunni mun Eimskip standa fyrir breytingum á aðstöðu fyrir farþega, á afgreiðslustöðum jafnt sem um borð í Herjólfi sjálfum. Má þar meðal annars nefna bætta aðstöðu fyrir börn.