Stefnur í mannauðsmálum

Markmið okkar er að styrkja fólk, ferla og vinnuumhverfi þannig að gildin okkar, liðsheild, framsækni, áreiðanleiki og virðing, birtist í daglegu starfi og styðji við heildarstefnu Eimskips og styrki um leið fyrirtækjamenninguna. Við viljum skapa öruggt, heilbrigt og sanngjarnt vinnuumhverfi þar sem starfsfólk hefur skýran ramma, tækifæri til vaxtar og upplifir að framlag þess skipti máli.

Stefnur í mannauðsmálum byggja á þeirri sýn að mannauðurinn sé ein mikilvægasta auðlind Eimskips og lykilforsenda árangurs félagsins.

EFTIRFARANDI STEFNUR MYNDA UMGJÖRÐ MANNAUÐSMÁLA EIMSKIPS:

1. Mannauðsstefna

2. Fræðslu- og starfsþróunarstefna

3. Stefna um fjölbreytileika, jöfnuð og inngildingu

4. Mannréttindastefna

5. Stefna gegn einelti, áreitni og ofbeldi

6. Heilsu- og vellíðunarstefna

7. Vinnuverndar- og öryggisstefna

Liðsheild
Við störfum saman sem ein liðsheild og fögnum góðum árangri saman.
Við deilum reynslu og þekkingu og erum samstíga gagnvart viðskiptavininum.

Framsækni
Við fögnum nýjum lausnum og bættum vinnubrögðum.
Við tökum frumkvæði, erum hugrökk og forvitin.

Áreiðanleiki
Við erum áreiðanleg og stöndum við það sem við segjum.
Við tökum ábyrgð og erum traustsins verð.

Virðing
Við sýnum samstarfsfólki, viðskiptavinum, samfélögum og umhverfinu virðingu.
Við berum virðingu fyrir aðföngum sem við nýtum í starfsemi okkar.

Mannauður Eimskips, þekking hans og færni, er mikilvægasta auðlind félagsins. Hópurinn samanstendur af ólíkum einstaklingum sem sinna mismunandi störfum og búa að ólíkri reynslu og þekkingu. Með sameiginlegum gildum stillir hópurinn saman strengi, byggir öflugt félag og eftirsóknarverðan vinnustað með sterkri liðsheild og metnaði.

Stjórnun
Stjórnendur leiða með góðu fordæmi og skapa umhverfi þar sem lögð er áhersla á liðsheild og opin samskipti. Þau leitast við að laða fram það besta í starfsfólki, hvetja það og styðja með reglulegri endurgjöf, tryggja áreiðanleika í upplýsingagjöf og stuðla að því að starfsfólk hafi skýran skilning á markmiðum og væntingum. Stjórnendur hvetja starfsfólk til að sýna frumkvæði, hugsa í lausnum og framsæknum vinnubrögðum, bera ábyrgð á því að bera gildi Eimskips áfram í daglegum ákvörðunum og samskiptum og leitast við að taka allar ákvarðanir á grunni virðingar, fagmennsku og sanngirni. Þeir skulu leitast við að greina áhættuþætti tengda vinnuumhverfi, vellíðan og mannréttindum starfsfólks og bregðast við eftir því sem við á.

Starfsmannaval
Ólíkir einstaklingar með mismunandi bakgrunn, reynslu og hæfileika eru lykillinn að velgengni Eimskips. 

Ráðningar byggja á hæfni, reynslu og metnaði, auk þess sem lögð er áhersla á fjölbreytileika og inngildingu.

Ferlar eru gagnsæir og tryggja að nýtt starfsfólk upplifi traust og fagmennsku frá fyrsta degi, í anda áreiðanleika og liðsheildar.

Vandað starfsmannaval tryggir að Eimskip hefur rétt fólk á réttum stað. Metnaður er lagður í að taka vel á móti nýju samstarfsfólki og veita því góðar upplýsingar og starfsþjálfun sem styður við liðsheild og árangur í starfi.

Samsetning framkvæmdastjórnar skal vera fjölbreytt með tilliti til hæfni, þekkingar, reynslu, menntunar og kyns. Markviss arftakaáætlun er unnin innan Eimskips með það að leiðarljósi að tryggja leiðtogaþróun innan félagsins, miðla áfram leiðtogahlutverkum, stuðla að fjölbreytileika í stjórnendastörfum og stöðugleika í rekstri félagsins.

Tilnefningarnefnd stjórnar gegnir því hlutverki að tryggja að stjórn félagsins í heild sé fjölbreytt hvað varðar hæfni, þekkingu, reynslu, menntun, kyn og óhæði. Nefndin starfar eftir starfsreglum tilnefningarnefndar sem birtar eru á vefsíðu félagsins.

Eimskip lítur á hæfni, nám og starfsþróun sem mikilvægan þátt í árangri félagsins. Markmið stefnunnar er að skapa starfsfólki jöfn tækifæri til vaxtar og þróunar. Þannig er henni ætlað að efla faglega og persónulega hæfni starfsfólks og stuðla að því að þekking og færni innan félagsins þróist í takt við stefnu, þarfir viðskiptavina og breytingar í starfsumhverfi.

Eimskip leggur áherslu á að skapa umhverfi sem hvetur til náms, þróunar og þekkingarmiðlunar. Fræðsla og þróun nær meðal annars til móttöku nýs starfsfólks, breytinga í starfi, starfsþróunar og annarra verkefna sem stuðla að aukinni þekkingu, hæfni og árangri.

Stjórnendur bera ábyrgð á að styðja við þróun starfsfólks, skapa tækifæri til náms og vaxtar og eiga reglulegt samtal um hæfni, markmið og þróunarþarfir. Starfsmannasamtöl eru mikilvægur vettvangur til að ræða starfsþróun, endurgjöf, hæfniuppbyggingu og framtíðarmöguleika innan félagsins.

Starfsfólk ber ábyrgð á eigin þróun með því að viðhalda og efla þekkingu sína og hæfni, sýna frumkvæði að námi og starfsþróun og taka virkan þátt í samtali um markmið og þróun í samráði við stjórnanda.

Starfsfólk og stjórnendur bera sameiginlega ábyrgð á að skilgreina þróunarmarkmið sem stuðla að árangri í starfi, faglegum vexti, persónulegum þroska og uppbyggingu þeirrar hæfni sem nauðsynleg er til að mæta þörfum félagsins til framtíðar.

Þróun hæfni getur meðal annars falist í:

• Faglegri hæfni sem tengist sérþekkingu, færni og reynslu á viðkomandi starfssviði

• Persónulegri hæfni svo sem samskiptum, leiðtogahæfni og aðlögunarhæfni

• Öflun réttinda, vottana og prófgráða, sem styðja við þróun starfsfólks og þarfir starfseminnar

• Þekkingarmiðlun og starfsþróun í starfi í gegnum fjölbreytt nám, verkefni, handleiðslu, samstarfi og nýtingu reynslu úr ólíku umhverfi svo sem skiptinámi við starfsstöðvar

Stefna og áætlun Eimskips um fjölbreytileika, jöfnuð og inngildingu  byggir á gildum félagsins um árangur, samstarf og traust.  Hún miðar að því að skapa umhverfi án aðgreiningar þar sem fjölbreytileiki, jöfnuður og inngilding er höfð í fyrirrúmi. 

Eimskip leggur áherslu á vinnuumhverfi þar sem einstaklingsmunur er virtur og allt starfsfólk hefur jafnan aðgang að tækifærum í anda virðingar og liðsheildar. Félagið tryggir sanngjarna meðferð í ráðningum, verkefnaúthlutun, daglegum samskiptum og framgangi í starfi. Framsækni birtist í því að þróa ferla sem stuðla að jöfnum tækifærum og sanngirni, og áreiðanleiki í því að ákvarðanir séu gagnsæjar og byggðar á málefnalegum viðmiðum.

Áætlun Eimskips um fjölbreytileika, jöfnuð og inngildingu, fjallar um markmið og aðgerðir sem ætlað er að tryggja starfsfólki þau réttindi sem kveðið er á um í lögum um jafna stöðu og jafnan rétt kynjanna. Áætlunin miðar að því að tryggja sanngjarna meðferð og jafna stöðu alls starfsfólks, óháð kyni, kynþætti, þjóðerni, kynhneigð, fötlun eða öðrum þáttum. Eimskip leggur áherslu á að skapa umhverfi þar sem sérhver einstaklingur upplifir að hann sé metinn, virtur og hafi áhrif á vinnuumhverfi sitt.

Launajafnrétti
Eimskip gætir fyllsta jafnréttis við ákvörðun launa og annarra starfskjara. Allt starfsfólk fær greidd jöfn laun og njóta sömu starfskjara fyrir jafnverðmæt störf, að teknu tilliti til reynslu og menntunar. Eimskip mismunar ekki starfsfólki í launum, hlunnindum eða kjörum eftir kyni, kynhneigð, kyntjáningu, trúarbrögðum, þjóðerni, fötlun, aldri, eða öðrum óviðkomandi þáttum. Það er stefna Eimskips að laun og önnur kjör séu samkeppnishæf við sambærileg störf á vinnumarkaði.

Ráðningar
Eimskip miðar að því að gæta fyllsta jafnréttis við ráðningu í öll störf. Störf skulu standa öllum sem uppfylla kröfur til starfsins opin til umsóknar og leitast skal við að auka fjölbreytileika. Leitast er við að bjóða upp á sveigjanleika í starfi svo sem hlutastörf þar sem það á við. Þá skal ávallt leitast við því að jafna kynjahlutfall þar sem því verður við komið.

Starfsþróun
Eimskip leggur áherslu á að allt starfsfólk í sambærilegum störfum njóti sömu möguleika til starfsþróunar, sí- og endurmenntunar og hafi jafnan aðgang að námskeiðum sem haldin eru til að auka þekkingu og hæfni í starfi eða sem undirbúning fyrir önnur störf.

Lögð er áhersla á fræðslu stjórnenda og starfsfólks um mikilvægi inngildingar og að ráðningar og starfsþróun taki mið af hæfni, getu og áhuga.

Framgangur í starfi
Við skipun í nefndir, vinnuhópa, við úthlutun verkefna eða þegar teknar eru ákvarðanir um framgang í starfi ræður fagleg þekking og reynsla mestu um val einstaklinga og stefnt er að jöfnum hlut kynja þar sem því verður við komið. Sérstök áhersla er lögð á að jafna stöðu kynjanna í stjórnunar- og áhrifastöðum þegar því verður við komið.

Aðbúnaður og aðgengi
Vinnuumhverfi og húsnæði eru skipulögð með það að markmiði að styðja við fjölbreyttar þarfir starfsfólks. Áhersla er lögð á aðgengi sem styður við sjálfstæði og virkni í starfi.

Samræming vinnu og einkalífs
Eimskip skipuleggur vinnufyrirkomulag og gerir nauðsynlegar ráðstafanir til að gera öllu starfsfólki kleift að samræma starfsskyldur sínar, einkalíf og ábyrgð gagnvart fjölskyldu eins og kostur er. Þessar ráðstafanir byggjast á gagnkvæmum skilningi vinnuveitanda og starfsfólks á þörfum hvors annars og vilja beggja aðila til að sýna tillitssemi og ná fram sanngjarnri niðurstöðu. Lykilhugtak í samræmingu vinnu og einkalífs er „sveigjanleiki”, sem beitt er með hagsmuni beggja aðila að leiðarljósi. Eimskip leitast við að styðja starfsfólk þegar aðstæður þess breytast, til dæmis vegna fjölskylduaðstæðna, heilsufars eða annarra persónulegra aðstæðna, með viðeigandi aðlögun á starfshlutfalli, verkefnum eða vinnufyrirkomulagi eftir því sem kostur er. Slíkur stuðningur getur meðal annars falist í hlutastarfi vegna skertrar starfsgetu, í tengslum við fæðingarorlof eða veikindi, sem og auknum sveigjanleika í aðdraganda starfsloka og lífeyristöku.

Eimskip leitast við að mæta þörfum fjölskyldufólks og hvetur öll kyn til að nýta sér fæðingarorlof. Foreldrar eru jafnframt hvattir til að skipta með sér ábyrgð vegna umönnunar og veikinda barna. Þá leitast Eimskip við að halda yfirvinnu starfsfólks innan eðlilegra marka og stuðla þannig að heilbrigðu jafnvægi milli vinnu og einkalífs.

Öll skulu vera jöfn fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis eða stöðu að öðru leyti. Öll kyn skulu njóta jafns réttar í hvívetna. Eimskip er aðili að UN Global Compact sem er alþjóðaverkefni á vegum Sameinuðu þjóðanna. Með þátttöku skuldbindur Eimskip sig til þess að stefna og starfshættir félagsins séu í samræmi við tíu meginreglur Sameinuðu þjóðanna um mannréttindi, vinnumarkað, umhverfismál og aðgerðir gegn spillingu.

Eimskip virðir mannréttindi. Markmið Eimskips er:

• Að tryggja mannréttindi starfsfólks Eimskips

• Að tryggja að Eimskip uppfylli kröfur laga og reglna í mannréttindamálum

• Að leitast við að greina, fyrirbyggja og draga úr neikvæðum áhrifum á mannréttindi

Eimskip skuldbindur sig til að fara að öllum gildandi lögum og reglum um mannréttindi sem fjalla um félagafrelsi, nauðungar- og þrælkunarvinnu, barnavinnu og misrétti á vinnustöðum og hvetur hagsmunaaðila sína til að gera slíkt hið sama.

Félagafrelsi
Eimskip virðir rétt starfsfólks til aðildar að stéttarfélagi eða að standa utan stéttarfélags.

Nauðungar- og þrælkunarvinna
Eimskip hafnar og vinnur gegn hvers konar nauðungar- og þrælkunarvinnu.

Barnavinna
Eimskip fylgir alþjóðlegum lögum og reglum um lágmarksaldur einstaklinga sem ráðnir eru til starfa. Félagið getur ákveðið að sá aldur geti verið hærri vegna eðlis starfa eða vegna laga í viðkomandi landi.

Misrétti á vinnustöðum

• Eimskip hafnar hvers kyns misrétti sem varðar vinnu og starfsval

• Starfsfólk er hvatt til að hafa samband við stjórnanda, sérfræðing mannauðsdeildar eða mannauðstengilið til að koma á framfæri áhyggjum séu þær fyrir hendi

• Félagið gerir þá kröfu að birgjar og undirverktakar virði mannréttindi og starfi í samræmi við siðareglur birgja

Eimskip líður ekki einelti, kynferðislega áreitni, kynbundna áreitni, ofbeldi, fordóma né mismunun af nokkru tagi. Komi upp aðstæður á vinnustað, í vinnuferðum, á viðburðum á vegum félagsins eða starfsmannafélags, sem lýsa má með neðangreindum hætti skal hafa samband við stjórnanda, sérfræðing mannauðsdeildar eða mannauðstengilið í viðkomandi landi, sem tryggir að viðbragðsáætlun sé virkjuð og málsmeðferð sé fagleg og óháð. Einnig má leita aðstoðar hjá trúnaðarmönnum stéttarfélaganna. Unnið er með sérhvert tilfelli og hlutaðeigandi aðilar studdir til að leysa málin. Þyki ástæða til eru utanaðkomandi sérfræðingar fengnir til aðstoðar.

Eimskip leggur áherslu á að starfsfólk geti komið á framfæri áhyggjum, kvörtunum eða ábendingum án ótta við neikvæðar afleiðingar og að mál séu tekin til viðeigandi skoðunar með trúnaði, fagmennsku og sanngirni að leiðarljósi.

Skilgreiningar: Þegar fjallað er um einelti, áreitni eða ofbeldi þá er stuðst við eftirfarandi skilgreiningar. Þessar skilgreiningar byggja á gildandi lögum og reglugerðum.

Einelti: Einelti er síendurtekin hegðun sem almennt er til þess fallin að valda vanlíðan hjá þeim sem fyrir henni verður, svo sem að gera lítið úr, móðga, særa eða ógna viðkomandi eða valda ótta. Skoðanaágreiningur eða ágreiningur vegna ólíkra hagsmuna fellur ekki hér undir.

Kynbundin áreitni: Hegðun sem tengist kyni þess sem fyrir henni verður, er í óþökk viðkomandi og hefur þann tilgang eða þau áhrif að misbjóða virðingu viðkomandi og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi fyrir viðkomandi.

Kynferðisleg áreitni: Hvers kyns kynferðisleg hegðun sem er í óþökk þess sem fyrir henni verður og hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, táknræn og/eða líkamleg.

Ofbeldi: Hvers kyns hegðun sem leiðir til, eða gæti leitt til, líkamlegs eða sálræns skaða eða þjáningar þess sem fyrir henni verður, einnig hótun um slíkt, þvingun eða handahófskennd svipting frelsis.

Kynbundið ofbeldi: Ofbeldi á grundvelli kyns sem leiðir til eða gæti leitt til líkamlegs, kynferðislegs eða sálræns skaða eða þjáninga þess sem fyrir því verður, einnig hótun um slíkt, þvingun eða handahófskennda sviptingu frelsis, bæði í einkalífi og á opinberum vettvangi.

Meintur þolandi: Sá sem telur sig verða fyrir einelti, kynferðislegri áreitni, kynbundinni áreitni, ofbeldi.

Meintur gerandi: Sá sem kvörtun um einelti, kynferðislega áreitni, kynbundna áreitni eða ofbeldi beinist að.

Eimskip stuðlar að almennri vellíðan og góðri andlegri, líkamlegri og félagslegri heilsu starfsfólks. Aukin vellíðan leiðir af sér aukin lífsgæði og ánægðara starfsfólk.

Eimskip leggur áherslu á að auka þekkingu starfsfólks um mikilvægi heilsu og öryggis og leggur þar með sitt af mörkum til forvarna gegn atvinnutengdum álagseinkennum, slysum, fjarveru og ótímabærum starfslokum vegna veikinda.

Hjá Eimskip er óheimilt að neyta áfengis eða annarra vímuefna á vinnustað eða á vinnutíma.

Vinnureglur varðandi tóbaksneyslu og bann við neyslu áfengis og vímuefna á vinnustað eru virkar og til þess gerðar að stuðla að góðri heilsu og öryggi starfsmanna, annarra hagsmunaaðila og eigna félagsins.

Eimskip er umhugað um heilsu og öryggi starfsfólks. Félagið býður upp á örugga og heilsusamlega vinnuaðstöðu sem frekast er kostur og leggur áherslu á að starfsfólk verndi sjálft sig, samstarfsfólk, utanaðkomandi einstaklinga, vörur, búnað og umhverfi fyrir hvers konar skaða.

Stefna félagsins er núllslysastefna, sem krefst sameiginlegrar ábyrgðar og stöðugrar umbótavinnu.

Rekstur Eimskips er í samræmi við landslög, alþjóðareglur og samþykktir og aðra viðurkennda staðla og viðmiðun hvað varðar vinnuvernd og öryggismál. Markmið Eimskips með forvarnastarfi er að lágmarka allan skaða hvort sem er á einstaklingum, vörum eða eignum.

Eimskip leggur áherslu á góða þekkingu og áhættuvitund og vinnur markvisst að því að efla og styrkja þá þætti.

Eimskip leggur áherslu á fyrirbyggjandi nálgun í vinnuvernd og öryggismálum, þar með talið áhættumat, fræðslu, viðeigandi verklag og stöðugar umbætur.

Eimskip hvetur starfsfólk til að tilkynna óöruggar aðstæður, atvik nærri slysi og aðrar áhyggjur tengdar vinnuvernd og öryggi svo unnt sé að bregðast við tímanlega.

Eimskip starfrækir viðbúnaðarteymi (óhappanefnd) sem kemur saman og stýrir aðgerðum ef alvarleg áföll verða í eða tengd starfsemi félagsins.

Mannauðsstefna Eimskips er samþykkt af framkvæmdastjórn og er Mannauðs- og samskiptasvið eigandi hennar. Stefnuna skal endurskoða á tveggja ára fresti. Stefnan er birt á vefsíðu Eimskips og er aðgengileg starfsfólki á innri vef Eimskips.

Samþykkt í framkvæmdastjórn Eimskipafélag Íslands hf.
Reykjavík 30. júní 2026