Nýlega bættist fyrsti rafknúni gámalyftarinn í tækjaflota Eimskips. Kraftvélar, umboðsaðili Kalmar á Íslandi, afhentu gámalyftarann í Sundahöfn í síðustu viku.
Tækið er það fyrsta sinnar tegundar sem afhent er á Íslandi og markar stóran áfanga í áframhaldandi þróun og endurnýjun tækjaflota Eimskips. Nýi rafknúni gámalyftarinn er mikilvægt skref í rafvæðingu starfsemi Eimskips og styður við markmið félagsins um að draga úr losun og ná kolefnishlutleysi árið 2040.
Samkvæmt áætlunum Kalmar losar hefðbundinn dísilknúinn gámalyftari um 132 tonn af CO₂ á ári, en rafknúni gámalyftarinn veldur engri beinni losun CO₂ við notkun.
Guðmundur Ágúst Aðalsteinsson, forstöðumaður hafnarsvæðis Eimskips í Sundahöfn, tók við gámalyftaranum frá Kraftvélum og Agla Huld Þórarinsdóttir, sjálfbærnistjóri Eimskips, klippti á rauða borðann í tilefni afhendingarinnar.